12 نصيحة لازم تعرفها قبل تبدأ GTA 6 بدون حرق لأحداث اللعبة
文章目录
عالم GTA 6 المفتوح مليان تفاصيل وأماكن تستاهل الاستكشاف، لكن قبل لا تنطلق وتغوص في عالم ليونيدا، فيه مجموعة من النصائح والحيل اللي بتفيدك وتسهّل عليك تجربتك من البداية!
جهّزنا لك دليل مافيه حرق، نستعرض فيه 12 ميزة وآلية مهمة في اللعبة، وبتساعدك تبدأ رحلتك في فايس سيتي وأنت عارف وش تسوي .. استمتعوا ♥️
1. كيف تغيّر مستوى الصعوبة؟
لعبة GTA 6 ما توفر خيارات صعوبة تقليدية مثل باقي الألعاب، لكن فيه طريقتين تقدر من خلالها تخلي تجربتك في ليونيدا أسهل وأقل تحدياً
كل اللي عليك تضغط على زر القائمة، ثم تدخل على Settings > Gameplay وتنزل لآخر الخيارات (رقم 24 و25)، وبتلقى خيارين تقدر تفعّلهم:
- Accessible Combat:
يقلل الضرر اللي تتلقاه أثناء الاشتباكات المسلحة، وبنفس الوقت يزيد الضرر اللي تسببه للأعداء، وهذا يخلي المواجهات النارية أسهل بكثير
- Reduced Vehicle Damage:
يقلل الضرر اللي تتعرض له سيارتك أثناء الحوادث أو الاشتباكات، وبالتالي تقل احتمالية فقدانك السيطرة عليها أو انفجارها
اللعبة بتنبهك إن تفعيل هالخيارات بيغيّر توازن وتجربة اللعب، وبيخليها أسهل بشكل ملحوظ. لكن لا تشيل هم، استخدامها ما يأثر على أحداث القصة ولا يعطّل التروفيات
2. كيف تستخدم تحكم GTA 5 وGTA Online؟
قدمت GTA 6 نظام تحكم جديد يواكب أسلوب اللعب المطوّر، مع تغيير بعض الأزرار، مثل تخصيص زر الركض وزر القفز بشكل مختلف عن الأجزاء السابقة
لكن إذا كنت من اللاعبين اللي تعودوا على تحكم GTA 5 وGTA Online خلال السنوات الماضية، وتفضّل ترجع لنفس الأزرار القديمة، تقدر تسوي هالشي بكل سهولة
اضغط على زر القائمة، ثم ادخل على Settings > Control Scheme
بتلقى إن نظام التحكم مضبوط تلقائياً على Default، لكن تقدر تغيّره إلى Classic وترجع لطريقة التحكم المعتادة في GTA 5
3. كيف تسرق السيارات بشكل أسرع؟
مثل ما يوحي اسم السلسلة، سرقة السيارات جزء أساسي من تجربة GTA 6، لكن المشكلة إن أغلب السيارات المتوقفة في شوارع فايس سيتي تكون مقفلة
ولحسن الحظ، فيه حركة بسيطة بتختصر عليك وقت اقتحام السيارات وسرقتها
أثناء ظهور لعبة التصويب المصغّرة (Minigame) الخاصة بالأنشطة الإجرامية، سواء كنت تستخدم أداة Slim Jim أو Clone Key أو تحاول تشغّل السيارة عن طريق توصيل الأسلاك (Hotwiring)، انتبه لوجود منطقة وردية بتظهر لك على الشاشة
هذي المنطقة تُعرف باسم Sweet Spot، وإذا قدرت توصل لها بتنجز عملية الاقتحام بشكل أسرع
حرّك عصا التحكم لين تلقى المكان الصحيح، واستغل الوقت اللي وفّرته عشان تهج من الموقع قبل لا أحد ينتبه لك!
4. كيف تعرف وش المهمة اللي عليك بعدها؟
عالم GTA 6 مليان حياة وتفاصيل، واللعبة تشجعك تستكشف بنفسك وتكتشف الأشياء اللي ممكن تسويها.. لكن أحياناً بتكون تبي تكمل القصة وما تدري وش المهمة التالية أو وين تتجه
لحسن الحظ، تقدر تعرف مهامك المتاحة بكل سهولة
افتح الخريطة عن طريق الزر المخصص لها "ستارت" ، وبعدها استخدم القائمة الجانبية الموجودة على يسار الشاشة، واضغط على سهم يمين ➡️ لعرض قائمة مهام القصة المتاحة.
بتلقى المهام الأساسية الإلزامية في أعلى القائمة، وتحتها المهام الاختيارية اللي تقدر تنفذها متى ما بغيت
والأحلى إنك تقدر تحدد أي مهمة مباشرة وتحط لها علامة على الخريطة عشان توصل لموقعها بسهولة
5. كيف تتنقل بسرعة بين الأماكن (Fast Travel)؟
على عكس بعض ألعاب العالم المفتوح، GTA 6 ما توفر نظام تنقل سريع تقليدي، لكن فيه طريقة تقدر من خلالها تختصر مشاويرك وتوصل لوجهتك مقابل مبلغ بسيط
كل اللي عليك تفتح جوالك عن طريق سهم فوق 🔼، وتدخل على تطبيق** RydeM**e
لازم يكون عندك وجهة محددة مسبقاً، وتقدر تختارها من داخل التطبيق أو تحط علامة على الخريطة قبل لا تفتح التطبيق
بعدها اختر Book Ryde
وبيجيك إشعار إن السائق بالطريق، وبتقدر تتابع موقعه من الخريطة المصغّرة
اركب السيارة، واضغط باستمرار على الزر المخصص للتركيز على السائق “L2” ، وبعدها اضغط باستمرار على زر تخطي الرحلة "مثلث"
مقابل 100 دولار، تقدر تتجاوز المشوار وتوصل لوجهتك مباشرة!
وطبعاً تكلفة الرحلات الطويلة بتكون أعلى من القصيرة، لكن بشكل عام تعتبر هالطريقة وسيلة مريحة ورخيصة نسبياً للتنقل بين مناطق الخريطة
6. كيف تحافظ على فلوسك؟
في GTA 6 فيه نوعين من الأموال: كاش تأخذه بمحفظتك، وفلوس تقدر تحفظها بأمان داخل حسابك البنكي في BuckMe، واللي ينفتح لك خلال الفصل الأول من القصة
وتقدر تشوف رصيدك من النوعين بأي وقت عن طريق الزر المخصص لعرض الأموال "سهم تحت" 🔽
لكن انتبه! الفلوس اللي تحملها بمحفظتك ممكن تخسرها إذا انقبض عليك (Busted) أو انقتلت أثناء اللعب (Wasted)، وعشان كذا الأفضل تحوّلها لحسابك البنكي أول بأول
وأسهل طريقة تسوي فيها هالشي إنك تفتح جوالك، وتدخل على تطبيق BuckMe، وبعدها تختار ATM Finder عشان تحدد أقرب جهاز صراف آلي و تودع فلوسك
7. كيف تعطل الأعداء بدون ما تقتلهم؟
خلال أحداث GTA 6، بيكوّن جيسون ولوسيا سجلاً إجرامياً خاصاً فيهم، وهذا السجل ممكن يأثر على طريقة تعامل الشخصيات والعالم المحيط معكم في ليونيدا
وبما إن قتل الأعداء يساهم في جعل سجلك الإجرامي أكثر عدوانية، فقد يكون من الأفضل أحياناً إنك تعتمد على أساليب غير قاتلة للتعامل معهم
أول طريقة هي التسلل ومباغتة الأعداء من الخلف، ثم الإمساك فيهم باستخدام R2، وبهالطريقة تقدر تفقدهم الوعي بدون ما تقتلهم
أما إذا دخلت في اشتباك مسلح، فتقدر تستهدف المناطق غير الحيوية في جسم العدو، مثل الركب والذراعين
ولمعرفة هالمناطق، اضغط على L3 + R3 "الانالوق" ، وبتظهر لك أجزاء الجسم باللون الأصفر عشان تقدر تحدد أماكن الاستهداف
وبتعرف إنك عطّلت العدو بدون ما تقتله إذا ظهرت علامة X صفراء في مؤشر التصويب الخاص بسلاحك، أما إذا ظهرت باللون الأحمر فهذا يعني إنك قتلته
8. كيف تحدد وجهتك بسرعة على الخريطة؟
إذا كنت تبي تحط علامة على موقع مهم في GTA 6، مو لازم كل مرة تفتح الخريطة وتدور عليه بنفسك
بدل هالطريقة، اضغط باستمرار على سهم تحت 🔽 ، وبتظهر لك قائمة تفاعلية داخل اللعبة تعرض مجموعة من الأماكن القريبة منك، مثل المحلات التجارية والوجهات المحددة ومهام القصة
تقدر تتنقل بين الخيارات وتحدد المكان اللي تبيه، وبعدها تضغط على الزر المخصص عشان تضيفه مباشرة إلى نظام الملاحة (GPS)، وتبدأ تتبع الطريق له
9. كيف تستدعي سيارتك لموقعك مباشرة؟
أكيد بيجيك وقت في GTA 6 تكون فيه بعيد عن سيارتك وتحتاجها تجيك بأسرع وقت، وهنا تقدر تستفيد من تطبيق Scooter Bros الموجود في جوالك
افتح جوالك، وادخل على التطبيق، وبعدها اختر السيارة اللي تبي تستدعيها
بتختلف التكلفة حسب المسافة اللي تحتاج السيارة تقطعها عشان توصلك، وكذلك حسب حالتها الحالية
بعد تأكيد الطلب، بتظهر سيارتك تلقائياً في موقع قريب منك، وبتقدر تعرف مكانها من خلال الخريطة المصغّرة
10. كيف تحتفظ بالسيارات اللي تسرقها؟
مو كل سيارة تسرقها أو تركبها في GTA 6 بتقدر تحتفظ فيها بشكل دائم، فلو لقيت سيارة عجبتك وتبي تضيفها لمجموعتك، فيه خطوات لازم تسويها
تقدر توقف السيارة مؤقتاً في أحد المواقف المخصصة (Parking Space) أو داخل أحد الكراجات، لكن إذا تبي تسجلها باسمك وتحتفظ فيها بشكل دائم، لازم تتوجه إلى أحد فروع Pay 'N' Spray
وهذي الخطوات:
اختر السيارة اللي تبي تحتفظ فيها، وحط علامة على أقرب فرع Pay 'N' Spray في الخريطة.
توجّه للفرع وادخل بالسيارة
اختر Register عشان تغيّر لوحات السيارة وتسجلها ضمن سياراتك
بتختلف الرسوم المطلوبة حسب قيمة السيارة، ولازم يكون عندك مكان شاغر ضمن خانات تخزين السيارات (Stored Vehicle slots)
وإذا كانت خاناتك ممتلئة، تقدر تبيع بعض سياراتك القديمة مباشرة من Pay 'N' Spray
وفيه خيار ثاني إذا كنت تبي توسّع مجموعتك، وهو إنك تفتح جوالك وتدخل على تطبيق Vice City Real Estate، واللي يتيح لك شراء كراجات إضافية وتوفير مواقف أكثر لسياراتك
هالميزة ما تتوفر من بداية اللعبة، وبتحتاج تتقدم في القصة إلى أن تفتحها خلال إحدى المهام
11. وين تحصل على التعديلات الخاصة بسيارتك؟
تقدر تحصل على التعديلات والتحسينات الأساسية لسيارتك من أي ورشة تعديل (Mod Shop)، لكن إذا كنت تدور على تعديلات متخصصة وخيارات إضافية، لازم تعرف الورشة المناسبة لكل نوع منها
تقدر تميّز هالورش من خلال أيقونة المفتاح الازرق (Blue Wrench) اللي تظهر على الخريطة
عشان توصل لها، افتح الخريطة واضغط على الزر المخصص لعرض فهرس المواقع "سهم يمين ➡️" ، وبعدها ادخل على Vehicles > Mod Shops
بتظهر لك ورش التعديل المتاحة، ابحث عن الورشة اللي تحمل أيقونة المفتاح الأزرق، وحدد موقعها كوجهة لك
وبمجرد ما توصل، بتلقى مجموعة من التعديلات والتطويرات المتخصصة المتاحة لسيارتك الحالية.
12. كيف توصل للرسائل المهمة بسرعة؟
مثل واقعنا، متابعة إشعارات الجوال في GTA 6 ممكن تاخذ من وقتك، خصوصاً مع كثرة الرسائل والتنبيهات اللي توصلك من الشخصيات المختلفة داخل اللعبة
لكن عشان ما تضيع بين كل هالإشعارات، وفرت Rockstar طريقة تجمع لك أهم الرسائل في مكان واحد عن طريق تطبيق Reminders
كل اللي عليك تفتح جوالك، وبعدها تضغط مربع للدخول إلى قائمة Reminders
بتلقى هناك قائمة مرتبة بأهم الرسائل والتنبيهات اللي تحتاج تنتبه لها، وتشمل الأخبار والمقالات داخل اللعبة، بالإضافة إلى الشخصيات غير القابلة للعب (NPCs) اللي ينتظرون منك ترد على رسائلهم
وبكذا تقدر تتابع أهم الأمور اللي تصير حولك بدون ما تضطر تراجع كل رسالة توصلك بشكل منفصل
شكرا للقراءة استمتعوا باللعبة الأفضل بالتاريخ!
منقول: من PushSquare




























